ჩვენი წარმატებული ტექ. გუნდის საშუალებით, შესაძლებლობა გვაქვს, კომპანიის მიღწევებზე საერთაშორისო მასშტაბით ვისაუბროთ. ლონდონში ჩატარებული კონფერენცია - “Fullstory Finserv Innovation Evening” ამის კარგი მაგალითია. ღონისძიებამ თიბისის გუნდს უმასპინძლა, სადაც სპიკერები ანა ებანოიძე, თიბისის სერვის ექსპერტი/გუნდის ლიდერი და გიორგი მახარაძე, თიბისის სერვის ექსპერტი/გუნდის ლიდერი იყვნენ.

ანამ და გიორგიმ ისაუბრეს თემაზე: „ჰიპერ პერსონალიზაცია დიდ მასშტაბებზე და მომხმარებლის გამოცდილების ოპტიმიზაცია” (Hyper Personalization at Scale & Optimising the Customer Journey with Fullstory). მათი გამოსვლა ინსპირაციული და საინტერესო აღმოჩნდა დამსწრე საზოგადოებისა და თავად Fullstory-სთვისაც, რომლის თანამშრომლებმაც აღნიშნეს, რომ თიბისიმ არაჩვეულებრივი ისტორია გააზიარა, თუ როგორ მიანიჭა მომხმარებელს მეტი კონტროლი აპლიკაციის მთავარ გვერდზე და მისცა საშუალება, თავად აერჩიათ, რისი ნახვა სურდათ. რამაც, თავის მხრივ, ხელი შეუწყო პოზიტიური განწყობის ჩამოყალიბებასა და ბრენდისადმი ლოიალობის გაღრმავებას.

„ასეთი ტიპის (საერთაშორისო) ღონისძიებაზე პირველად წარვდექი სპიკერის როლში. ეს საპასუხისმგებლო და, ამავდროულად, ძალიან სასიამოვნო გამოცდილებაა, როცა შენს კომპანიას, ქეისებსა და სამუშაო პროცესს ამხელა აუდიტორიას უზიარებ.

მე და ჩემი კოლეგა გიორგი მახარაძე ერთად ვამზადებდით მოხსენებას. გვინდოდა გვეჩვენებინა რეალური გავლენა, რომელიც მონაცემებზე დაფუძნებულ გადაწყვეტილებებს აქვს მომხმარებლის გამოცდილებაზე და არა უბრალოდ კარგად აწყობილი პროცესი. საბოლოოდ, იმდენად კარგი ქეისები შევკარით, ღონისძიების ბოლოს რომ ჰკითხეს აუდიტორიას, რა დაამახსოვრდათ, სწორედ ჩვენი მაგალითები ახსენეს.

ამ ღონისძიების მთავარი თემა იყო Real-Time Behavioral Data. გავიგე, რომ საკმარისი არ არის მხოლოდ ისტორიული მონაცემების ანალიზი.

ხოლო, თუ ხელოვნურ ინტელექტს ქცევის მონაცემებს მიამატებ და წინასწარ გამოიცნობ მომხმარებლის მომდევნო ნაბიჯებს, მაშინ ნამდვილად სწორ გზას ადგახარ." - ამბობს ანა.

„საერთაშორისო დონეზე ასეთი გამოსვლა ჩემთვის პირველი და საინტერესო გამოცდილება იყო. თავიდან თითქოს უფრო საშიშად ჟღერდა, მაგრამ მერე აღმოჩნდა, რომ საკმაოდ ღირებული use case-ები გვქონდა, რომლებითაც ბევრი ადამიანი დაინტერესდა.

ანამ ონბორდინგის ნაწილზე ისაუბრა, მე კი მობაილბანკის მთავარი გვერდის განახლებაზე. ჩვენს მომხმარებელს შესაძლებლობა მივეცით, მთავარი გვერდი თავიანთი სურვილისა და პრეფერენციების მიხედვით დაელაგებინათ

– გამოეჩინათ სასურველი სექციები და გაექროთ ისინი, რომლებიც ნაკლებად სჭირდებოდათ. 

ჩვენი მაგალითებითა და გამოცდილებით ძალიან დაინტერესდნენ ამ ღონისძიების მონაწილეები. იმდენად მოეწონათ ჩვენი პერსპექტივები და მიდგომები, რომ გამიმტკიცდა განცდა, თუ რამდენად დიდ ტექ კომპანიაში ვმუშაობთ, რომელიც საერთაშორისო მოწინავე სტანდარტებით მუშაობს მომხმარებლებისთვის პრობლემების გადასაჭრელად და გამოცდილების გასამარტივებლად.

საბოლოო ჯამში, იმას გავუსვით ხაზი, რომ customer insight-ები ყველაზე ღირებული აქტივია პროდუქტისა და კომპანიის განვითარებისთვის, ხოლო სხვადასხვა ანალიტიკის ხელსაწყოები, მათ შორის fullstory, ამაში ძალიან გვეხმარება.” - გიორგი მახარაძე.