ჯილდო, რომელიც USAID-ის ეკონომიკური უსაფრთხოების პროგრამამ თიბისისთან, მაშავის ცენტრთან და გაეროს ქალთა ორგანიზაციასთან თანამშრომლობით საქართველოში დააწესა, ექვს კატეგორიაში გაიცემა. 

ამ სტატიაში მოგიყვებით სწორედ იმ ადამიანებსა, პროგრამებსა და ორგანიზაციებზე, რომლებიც ICT სფეროში ქალების ხელშეწყობისა და თანასწორი, მრავალფეროვანი გარემოს ჩამოყალიბებისთვის ყოველდღიურად დაუღალავად შრომობენ.

მომავლის ლიდერი

მომავლის ლიდერი 18-დან 30 წლამდე გოგოა, რომელიც ტექნოლოგიების დახმარებით საზოგადოებაში პოზიტიურ ცვლილებებს უწყობს ხელს და ამ სფეროში გამორჩეული მიღწევებიც აქვს.

ამ ნომინაციაში წარდგენილნი არიან:

ანა რობაქიძე, ინჟინერიის მიმართულების ხელმძღვანელი Clientela-ში

ანამ კოდირება 13 წლის ასაკიდან დაიწყო და მალევე დამოუკიდებლად შექმნა ვებსაიტი, რომელსაც ათასობით მომხმარებელი ჰყავდა. მან კომპიუტერული მეცნიერებები New York Tech-ში შეისწავლა და წარჩინებითაც დაასრულა. მოგვიანებით ამერიკული გამოცილებით საქართველოში დაბრუნდა და დააფუძნა კომპანია Clientela, რომელიც თანამშრომლობს მსოფლიოს უდიდეს კონგლომერატებთან: Cartier-თან, Gucci-სთან და სხვებთან. ანა 2018 წელს ფორბსის 30 Under 30-ის სიაში, ტექნოლოგიის კატეგორიაშიც მოხვდა.

მარიამ გაგუა, Fennec Tech Studio-ს თანადამფუძნებელი და საქართველოს ბანკის პროდუქტების მენეჯერი

მარიამი სან დიეგოს სახელმწიფო უნივერსიტეტის კომპიუტერული მეცნიერებების ფაკულტეტის კურსდამთავრებულია. მას 6-წლიანი გამოცდილება აქვს კომპიუტერული ინჟინერიისა და ტექ პროდუქტების მენეჯმენტის მიმართულებით. უმუშავია მრავალ ორგანიზაციასთან, მათ შორისაა: Google, Intel, გაეროს პროგრამები, ამერიკის საელჩო, საქართველოს ბანკი, GITA, CENN და სხვები. ის თავისი პლატფორმით აქტიურად უწევს პოპულარიზაციას ტექნოლოგიების დარგს ქალებში და ზოგადად, ახალგაზრდებში.

მარიამ ლომთაძე, Dev Degree პროგრამის სტაჟიორი Shopify-ში

მარიამი 19 წლისაა, დაახლოებით 10 წლიდან დაინტერესდა კომპიუტერული მეცნიერებით, მალევე შეუერთდა პროგრამირების კლუბს სკოლაში და მას შემდეგ მის ცხოვრებაში კოდირებამ მნიშვნელოვანი ადგილი დაიკავა. მარიამი ამჟამად კარლტონის უნივერსიტეტში კომპიუტერულ მეცნიერებებს სწავლობს, ოტავაში ცხოვრობს და Shopify-ში Dev Degree პროგრამაშია ჩართული. ის მრავალი კონკურსისა თუ ჰაკათონის გამარჯვებულია

ICT სფეროს ჩემპიონი

ICT სფეროს ჩემპიონი გახდება ის ქალი, ვისაც ტექნოლოგიურ ინდუსტრიაში გადაწყვეტილების მიმღები პოზიცია უჭირავს და სხვებს კარგ მაგალითს აძლევს.

ნომინაციაში წარდგენილნი არიან:

მაკა მახათაძე, IT Academy Step-ის ქართული ფილიალის თანადამფუძნებელი და დირექტორი

მაკა ფიზიკა-მათემატიკისა და კომპიუტერული მეცნიერებების სპეციალისტია. 2015 წელს მან დააარსა IT Academy STEP-ის ქართული ფილიალი, რომელიც აქტიურად მუშაობს ტექნოლოგიური საკითხების შესახებ ცნობიერების ამაღლების კუთხით. მაკა საქართველოს განათლების სამინისტროს დახმარებას უწევს ტექნოლოგიურ ტრანსფორმაციასა და მთელ საგანმანათლებლო სისტემაში მონაცემებზე დაფუძნებული გადაწყვეტილებების მიღებაში. მის ერთ-ერთ მიღწევებს შორისაა პროგრამა, რომლის მეშვეობით პირველკლასელებს კომპიუტერები გადაეცათ. 

ნათია ხუხუნაიშვილი, IT Service Development-ის მენეჯერი

ნათია თბილისის სახელმწიფო უნივერსიტეტის ბაკალავრისა და მაგისტრის ხარისხის მფლობელია კომპიუტერულ მეცნიერებებში. მას საინფორმაციო ტექნოლოგიებში მუშაობის 17 წელზე მეტი გამოცდილება აქვს. ნათიას დიდი წვლილი მიუძღვის მაღალი დონის სახელმწიფო  პროექტების განხორციელებაში, მათ შორის პორტალ My.gov.ge-ის შექმნასა და საქართველოს მოქალაქეებისთვის ელექტრონული დოკუმენტების გაცვლის სისტემის შემუშავებაში.

სოფო ჭყოიძე, Pulsar AI-ის თანადამფუძნებელი და ოპერაციების უფროსი ოფიცერი 

სოფოს კომერციულ და ხელმძღვანელ პოზიციებზე მუშაობის ხუთ წელზე მეტი გამოცდილება აქვს. ის ამჟამად Pulsar AI-ის ოპერაციების უფროსი ოფიცერია. კომპანია სპეციალიზებულია ხელოვნური ინტელექტის მიმართულებით. 2017 წლიდან, სოფოს ხელშეწყობით, კომპანია 5-ჯერ გაიზარდა და შემოსავალი 15-ჯერ მოემატა. სოფოს მრავალ მიღწევას შორისაა ფორბსის 30 Under 30-ის სიაში მოხვედრა ტექნოლოგიების მიმართულებით.

ტექნოლოგიური სტარტაპი

ტექ-სტარტაპის ნომინაციაში გაიმარჯვებს კომპანია, რომელსაც ფლობს ან მართავს ქალი და მნიშვნელოვანი მიღწევები აქვს ინოვაციური პროდუქტების, სერვისებისა თუ ბიზნესმოდელების შექმნაში საკომუნიკაციო ტექნოლოგიების მიმართულებით. წარდგენილნი არიან:

CityPay.io 

CityPay.io რეგიონში პირველი ფინტექ კომპანიაა, რომელმაც ბაზარზე ინოვაციური გადახდების პროგრამა დანერგა — ის ნებისმიერ ბიზნესს კრიპტოვალუტით გადახდის საშუალებას აძლევს. კომპანია 15 ადამიანისგან შედგება, მათგან 6 ქალია, 5 მენეჯერული პოზიციიდან კი 3-ს ქალი იკავებს.

Phubber 

Phubber ციფრული პლატფორმაა სოციალური შოპინგისთვის. აქ მომხმარებლებს შეუძლიათ იყიდონ და გაყიდონ ტანსაცმელი, ფეხსაცმელი, აქსესუარები და თავის მოვლის პროდუქტები. კომპანიის 41 თანამშრომლიდან 32 ქალია. საყურადღებოა, რომ მისი მომხმარებლების რაოდენობა ასი ათასს აჭარბებს.

Quickcash.AI

Quckcash.AI B2B ფინტექ პლატფორმაა. უფრო კონკრეტულად კი ის მომხმარებლებს ბიზნესის კრედიტუნარიანობის შემოწმების ინოვაციურ გზებს სთავაზობს. Quckcash.AI-ის ხუთი თანამშრომლიდან ერთი ქალია — თავად პლატფორმის დამფუძნებელი. კომპანიამ კი უკვე მოიზიდა 250 ათას დოლარზე მეტი ინვესტიცია.

ქალების გაძლიერების პროგრამა

ეს ნომინაცია აღიარებას მოუტანს იმ პროგრამას, პროექტს თუ საზოგადოებრივ ინიციატივას, რომელიც ქალების ტექნოლოგიებში ჩართულობას მათი უნარების განვითარებით, მენტორობით, საჯარო კამპანიებით და სხვა აქტივობებით უწყობს ხელს. ამ ნომინაციაში წარდგენილი არიან:

ქალთა კოდირების სკოლა (ბიზნესისა და ტექნოლოგიების უნივერსიტეტი)

ბიზნესისა და ტექნოლოგიების ამ პროგრამის მეშვეობით ქალები სხვადასხვა უნარს ითვისებენ — სწავლობენ Front და Back-end დეველოპმენტს, ხელოვნურ ინტელექტსა და მანქანური დასწავლის პროგრამებს, მონაცემთა ანალიტიკას და სხვა საკითხებს. 5 წლის განმავლობაში პროგრამამ ტექნოლოგიურ სამეწარმეო ეკოსისტემაში 5000-ზე მეტი გოგო ჩართო.

ინჟინერიის სკოლა გოგოებისთვის (ილიას სახელმწიფო უნივერსიტეტი)

ამ პროექტის მთავარი მიზანია, გოგოებში ტექნოლოგიებისა და ინჟინერიისადმი ინტერესი გააძლიეროს, დაეხმაროს მათ ინჟინერიის კუთხით კარიერის განვითარებაში. სტუდენტებს ამ სკოლაში ტექნოლოგიების დარგში უკვე წარმატებული გოგოები უწევენ მენტორობას. ამჟამად მასში 100 ბენეფიციარია ჩართული.

ქალების ეკონომიკური გაძლიერება (ინოვაციური განათლების ფონდი)

პროგრამა დასავლეთ საქართველოს ხუთ რეგიონში დაინერგა და 18-დან 35 წლამდე ქალებს სოციალური მედიის, ვებ დეველოპმენტისა და ბიზნეს იდეებზე მუშაობის უნარებს უვითარებს. პროგრამის ფარგლებში ჩატარდა ტრენინგები, რითაც იმ ქალებსა და გოგოებს, რომლებიც მძიმე სოციალურ პირობებში იმყოფებიან, კარიერის შენებისკენ ახალი გზები გაუკვალეს.

მრავალფეროვნების მხარდამჭერი ორგანიზაცია

ნომინაციაში გაიმარჯვებს ის ორგანიზაცია, რომელმაც ქალებისთვის საინფორმაციო და საკომუნიკაციო ტექნოლოგიებში თანაბარი, მრავალფეროვანი გარემო შექმნა. ამ ნომინაციაში წარდგენილნი არიან:

ბიზნესისა და ტექნოლოგიების უნივერსიტეტი

ბიზნესისა და ტექნოლოგიების უნივერსიტეტი საქართველოში სამეწარმეო ეკოსისტემის გაძლიერებით და ინოვაციების ხელშეწყობით დასავლური სტანდარტების საგანმანათლებლო ცენტრს ქმნის. მისი პროექტების დიდი ნაწილი განსაკუთრებულ აქცენტს აკეთებს ქალების გაძლიერებაზე, ხელს უწყობს მათ, ჰქონდეთ წვდომა განათლებაზე ტექნოლოგიური მიმართულებით, მუშაობს გენდერული უთანასწორობის აღმოფხვრისა და ეკონომიკური გაძლიერების კუთხით.

ჯეოლაბი

ჯეოლაბი ინოვაციებისა და ახალი ტექნოლოგიების ლაბორატორია და ტრენინგ ცენტრია.. ის სხვადასხვა სახის შეხვედრასა და ლექციას უწევს ორგანიზებას იმ ადამიანებისთვის, რომლებიც ახალი ტექნოლოგიებით არიან დაინტერესებული. ჯეოლაბს 2015 წელიდან აქვს სპეციალური სასტიპენდიო პროგრამა გოგონებისთვის, რომელიც მიზნად ისახავს ტექნოლოგიურ სფეროში მათ მოტივირებას და გაძლიერებას.

Smart Academy

Smart Academy თანამედროვე საგანმანათლებლო ინსტიტუტია, რომელიც დაინტერესებულ პირებს ტრენინგ კურსებს, ვორქშოპებს, მასტერკლასებსა თუ საჯარო ლექციებს სთავაზობს. სმარტ აკადემიის თანამშრომელთა 60% ქალია. ის არაფორმალური განათლების ერთ-ერთი დიდი სივრცეა საქართველოში და ყოველთვის ცდილობს ხელი შეუწყოს მრავალფეროვნებას. 

ICT სექტორში ქალების გაძლიერების ქომაგი

ეს ნომინაცია იმ ქალის ან კაცის წვლილს აღიარებს, რომელიც დარგის ლიდერია და გენდერულ თანასწორობას უწყობს ხელს. ამასთან, ის მისაბაძი მაგალითი უნდა იყოს სხვებისთვის ქალების მხარდაჭერის კუთხით. ნომინანტებს შორისაა:

ლილი ფულარიანი — ციფრული ტექნოლოგიების სპეციალისტი, ლექტორი და ციფრული ცოდნის გამავრცელებელი ქალების თანადამფუძნებელი

ლილი 28 წლისაა და ციფრული ტექნოლოგიების სპეციალისტია. ასწავლის სოციალური მედიის მარკეტინგს, ვებსაიტის მენეჯმენტსა და სხვა ციფრულ ინსტრუმენტებს. ლილიმ თანამოაზრეებთან ერთად ორგანიზაცია “ციფრული ცოდნის გამავრცელებელი ქალები” დააარსა და რეგიონებში ბავშვებსა და ქალებს ციფრულ ტექნოლოგიებს ასწავლის.

მაკო ქურთიაშვილი, Smart Academy-ის გენერალური მენეჯერი, Smart Web-ის მმართველი პარტნიორი, ნიკოლა ტესლას სკოლის თანადამფუძნებელი, HIRO-ს სტრატეგიული მრჩეველი

მაკო 2011 წლიდან საინფორმაციო ტექნოლოგიების მიმართულებით აქტიურად მუშაობს. 2018 წლიდან მაკო სმარტ აკადემიის გენერალური მენეჯერია, სადაც 40-ზე მეტი ტრენინგ კურსი ტარდება. 2020 წლიდან კი მასთან აფილირებული სასწავლო სივრცე ნიკოლა ტესლას სკოლა დააარსა, სადაც ბავშვებს განათლების მიღებაში უწყობს ხელს.

მერაბ ლაბაძე ინოვაციური განათლების ფონდის დირექტორი და თანადამფუძნებელი

მერაბ ლაბაძე ფიზიკოსი და განათლების პოლიტიკისა და ადმინისტრირების სპეციალისტია. ის ერთ-ერთი პირველი ადამიანი იყო, რომელმაც საქართველოში ელექტრონული მთავრობისა და ელექტრონული განათლების განვითარება დაიწყო. მერაბმა 2010 წელს ინოვაციური განათლების ფონდი დააარსა, რომელიც საქართველოში ICT და STEM მიმართულებით განათლების გავრცელებასა და საგანმანათლებლო პროცესებში ინოვაციური მეთოდების დანერგვას ემსახურება. 

გრეის ჰოპერის სახელობის ჯილდო საქართველოში წელს დაარსდა. გრეის ჰოპერი ამერიკელი პროგრამისტი, ერთ-ერთი პირველი კომპიუტერული მეცნიერი ქალი, გამორჩეული მათემატიკოსი და წარმატებული საზღვაო ოფიცერი იყო. 

თითოეულ კატეგორიაში გამარჯვებულები, გარდა საჯარო აღიარებისა, მონაწილეობას მიიღებენ სასწავლო ვიზიტში ისრაელში, რომელიც ხორციელდება მაშავის ცენტრსა და საქართველოში ისრაელის საელჩოსთან თანამშრომლობით. ამას გარდა, თიბისიმ და გაეროს ქალთა ორგანიზაციამ რამდენიმე კატეგორიისთვის სპეციალური პრიზები დააწესეს.

2 ივნისს, თიბისი ბიზნესის ფეისბუქ გვერდზე, გრეის ჰოპერის ჯილდოს ექვსი ნომინაციის გამარჯვებულები ლაივ რეჟიმში გამოვლინდებიან.